அந்த நேரத்தில் வெளிய போகாதீங்க… அச்சத்தில் தவிக்கும் பொதுமக்கள்… வனத்துறையினரின் அறிவுரை…!!

ஒற்றை காட்டு யானை குடியிருப்பு பகுதிகளை முற்றுகையிட்டதால் பொதுமக்கள் அச்சத்தில் உள்ளனர்.

நீலகிரி மாவட்டத்தில் உள்ள கூடலூர் மற்றும் அதனை சுற்றியுள்ள பகுதிகளில் காட்டு யானைகள் நடமாட்டம் அதிக அளவில் காணப்படுகிறது. கடந்த சில நாட்களுக்கு முன்பு காட்டு யானைகளை அடர்ந்த வனப்பகுதிக்குள் விரட்டியடிக்க வேண்டி பொதுமக்கள் போராட்டத்தில் ஈடுபட்டுள்ளனர். இந்நிலையில் அதிகாலை நேரத்தில் கல்லிங்கரை குடியிருப்பு பகுதிக்குள் நுழைந்த ஒற்றை காட்டு யானை பொது மக்களின் குடியிருப்புகளை முற்றுகையிட்டுள்ளது. இதனால் தொழிலாளர்கள் வீட்டை விட்டு வெளியே வர முடியாமல் அச்சத்தில் உள்ளனர்.

இதனையடுத்து அந்த காட்டு யானை அங்கு பயிரிடப்பட்டுள்ள பயிர்களை மிதித்து நாசப்படுத்தியது. இதுகுறித்து பொதுமக்கள் உடனடியாக வனத்துறையினருக்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற வனத்துறையினர் இந்த காட்டை யானையை வனப்பகுதிக்குள் விரட்டியடித்தனர். இதுகுறித்து வனத்துறையினர் கூறும்போது இரவு நேரத்தில் தனியாக பொதுமக்கள் யாரும் வெளியே செல்லக் கூடாது எனவும், எங்கு போனாலும் கவனமாக இருக்க வேண்டும் எனவும் தெரிவித்துள்ளனர்.