காட்டு யானைகள் ரேஷன் கடையை உடைத்து நாசப்படுத்திய சம்பவம் பொதுமக்களிடையே அச்சத்தை ஏற்படுத்தியுள்ளது.
நீலகிரி மாவட்டத்திலுள்ள பந்தலூர் மற்றும் அதனை சுற்றியுள்ள பகுதிகளில் ஏராளமான வனவிலங்குகள் வாழ்ந்து வருகின்றன. இந்நிலையில் 5 காட்டுயானைகள் ராக்வுட் பகுதியில் முகாமிட்டுள்ளதால் பொதுமக்கள் மிகவும் அச்சத்தில் இருக்கின்றனர். இதனையடுத்து காட்டு யானைகள் அப்பகுதியில் இருக்கும் ரேஷன் கடையின் கதவை உடைத்து உள்ளே இருந்த அரிசி, பருப்பு, சர்க்கரை போன்ற உணவு பொருட்களை தின்று நாசப்படுத்தியுள்ளது.
இது குறித்து தகவலறிந்த வனத்துறையினர் சம்பவ இடத்திற்கு விரைந்து சென்று காட்டு யானைகளை வனப்பகுதிக்குள் விரட்டியடித்தனர். ஆனால் காட்டு யானைகளை அடர்ந்த வனப்பகுதிக்குள் செல்லாமல் அப்பகுதியிலேயே சுற்றி திரிவதால் பொதுமக்கள் மிகவும் அச்சத்தில் உள்ளனர். இதனால் வனத்துறையினர் அப்பகுதியில் தீவிர கண்காணிப்பு பணியில் ஈடுபட்டுள்ளனர்.