யானை தாக்கியதால் விவசாயி பரிதாபமாக உயிரிழந்த சம்பவம் சோகத்தை ஏற்படுத்தியுள்ளது.
கிருஷ்ணகிரி மாவட்டத்தில் உள்ள புல்லள்ளி மலை கிராமத்தில் விவசாயியான முனுசாமி என்பவர் வசித்து வந்துள்ளார். இந்நிலையில் தனது உறவினர் வீட்டிற்கு சென்ற முனுசாமி நீண்ட நேரமாகியும் திரும்பி வரவில்லை. இதனை அடுத்து உடலில் காயங்களுடன் முனுசாமி மாரண்டஅள்ளி காப்புக் காட்டில் இறந்து கிடப்பதாக வனத்துறையினருக்கு தகவல் கிடைத்துள்ளது. அந்த தகவலின்படி சம்பவ இடத்திற்கு விரைந்து சென்ற வனத்துறையினர் இறந்து கிடந்த முனுசாமியின் உடலை பார்வையிட்டுள்ளனர். அப்போது காட்டு யானைகள் முனுசாமியின் உடலை சுற்றி நின்று கொண்டிருந்தது.
இதனையடுத்து காட்டு யானை தாக்கியதால் தான் முனுசாமி உயிரிழந்தது தெரியவந்துள்ளது. இதனால் பட்டாசுகள் வெடித்து வனத்துறையினர் யானையை விரட்டி அடித்த பிறகு மூங்கில் தூளியில் முனுசாமியின் உடலை வைத்து வனப்பகுதி வழியாக கொண்டு சென்றனர். அதன்பிறகு காவல்துறையினர் அவரது உடலைக் கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.