சிற்பக் கலைக் கல்லூரி மாணவர் பழங்காலம் முதல் தற்காலம் வரையிலான ஓட்டு போடும் முறையை வடிவமைத்து முதல் பரிசை பெற்றுள்ளார்.
தமிழ்நாடு தேர்தல் ஆணையத்தின் சார்பில் தமிழக சட்டமன்ற தேர்தல் 100 சதவீத வாக்குப்பதிவை முன்னிறுத்தி, தமிழகத்தில் உள்ள அனைத்து அரசு நுண்கலை கல்லூரிகளில் படிக்கும் மாணவர்களுக்கு, வாக்காளர்கள் எளிதில் புரிந்து கொள்கின்ற வகையில் விழிப்புணர்வு மாதிரி சிற்பங்களை வடிவமைக்கும் போட்டியானது நடத்தப்பட்டது. இந்த போட்டியில் பத்துக்கும் மேற்பட்ட மாமல்லபுரம் அரசினர் சிற்பக் கலைக் கல்லூரி மாணவர்கள் பங்கேற்றனர். அப்போது இந்த போட்டியில் தமிழ்நாடு தேர்தல் ஆணையர் மற்றும் வாக்காளர்களை கவரும் விதமாக பழங்கால ஓட்டு போடும் முறை முதல் தற்போதைய வாக்குப்பதிவு எந்திரம் ஓட்டு போடும் முறை வரை, நாடாளுமன்ற கட்டிடம்மற்றும் தமிழக சட்டமன்ற கட்டிடம் போன்றவற்றை சிற்பத்தில் அழகுற மரச்சிற்ப பிரிவு பட்டப்படிப்பு இறுதியாண்டு படிக்கும் சுதர்சன் என்ற மாணவர் வடிவமைத்துள்ளார். இந்நிலையில் தேர்தல் ஆணையத்தின் சார்பில் சிறந்த விழிப்புணர்வு சிற்பமாக இந்த மரச்சிற்பம் முதல் பரிசுக்கு தேர்ந்தெடுக்கப்பட்டது. இதனை அடுத்து தமிழக கவர்னர் பன்வாரிலால் புரோகித் குடியரசு தின விழாவில் வைத்து இந்த மாணவருக்கு முதல் பரிசு வழங்கினார்.
இதேபோல் நாட்டிலுள்ள ஒவ்வொரு குடிமகனுக்கும் ஓட்டுரிமை முக்கியம் என்ற கருத்தை முன்னிறுத்தி, மெழுகில் வட்ட வடிவில் ஓட்டு போட்டுவதற்கு அடையாளமாக ஒரு விரலை காண்பித்த நிலையில், சுற்றி பல்வேறு பணி செய்கின்ற வக்கீல்கள், கலைஞர்கள், டாக்டர்கள், விவசாயிகள், போலீசார், மாணவர்கள், ஊனமுற்றோர், துப்புரவு பணியாளர்கள், பிச்சைக்காரர், கர்ப்பிணிப் பெண், சமூகத்தில் உயர்ந்த மனிதர் போன்ற அனைவரும் ஓட்டு போட வேண்டும் என்ற விழிப்புணர்வோடு அரசு சிற்பக்கலைக் கல்லூரியில் உள்ள உலோக பிரிவில் பட்டப்படிப்பு இறுதியாண்டு படிக்கும் முரட்டு கருப்பன் என்ற மாணவர் மெழுகுச் சிற்பத்தை உருவாக்கியுள்ளார். இவரது சிற்பம் இந்த போட்டியில் மூன்றாம் பரிசை பெற்றது. இதனை தொடர்ந்து கல்லூரி முதல்வர் ராஜேந்திரன், சக ஆசிரியர்கள், தமிழ்நாடு தேர்தல் அதிகாரி சத்யபிரதா சாகு மற்றும் அதிகாரிகள் பலர் தமிழக அளவில் வாக்காளர் விழிப்புணர்வுக்காக நடத்தப்பட்ட இந்த போட்டியில் முதல் பரிசை பெற்ற சுதர்சனையும், மூன்றாவது பரிசை பெற்ற முரட்டு கருப்பன் என்ற மாணவரையும் பாராட்டியுள்ளனர்.