டிமாண்டி காலனி, இமைக்கா நொடிகள் திரைப்படங்களின் வெற்றியை அடுத்து அஜய் ஞானமுத்து இயக்கியுள்ள படம் கோப்ரா ஆகும். விக்ரம் கதாநாயகனாக நடித்து இருக்கும் இந்த படத்தில் இவருக்கு ஜோடியாக ஸ்ரீநிதிஷெட்டி நடித்துள்ளார். அத்துடன் கே.எஸ்.ரவிகுமார், இந்திய கிரிக்கெட் அணியின் முன்னாள் வீரர் இர்ஃபான் பதான், மியா ஜார்ஜ், கனிகா, மிருணாளினி, ஜான் விஜய் போன்றோர் முக்கிய கதாபாத்திரத்தில் நடித்து இருக்கின்றனர்.
லலித்குமார் தயாரித்துள்ள இந்த படத்திற்கு ஏ.ஆர்.ரஹ்மான் இசையமைத்து உள்ளார். அண்மையில் இந்த படத்தின் போஸ்டர்கள், சிங்கிள் பாடல்கள் வெளியாகி ரசிகர்கள் மத்தியில் நல்ல வரவேற்பை பெற்றது. இந்த படத்தின் இறுதிகட்ட பணிகள் நடைபெற்று வரும் சூழ்நிலையில் “கோப்ரா” திரைப்படம் வரும் ஆகஸ்ட் 11ஆம் தேதி திரையரங்குகளில் வெளியாக இருக்கிறது. இப்படத்தின் யுகே மற்றும் ஐரோப்பா தியேட்டர் ரிலீஸ் உரிமத்தை வலிமை, பீஸ்ட், விக்ரம் ஆகிய படங்களை ரிலீஸ் செய்த அகிம்சா எண்டர்டெயின் மெண்ட் நிறுவனம் பெற்றுள்ளது.
உதயநிதி ஸ்டாலினின் ரெட்ஜெயன்ட் மூவீஸ் நிறுவனம் இந்த படத்தை வெளியிடுகிறது. இந்த நிலையில் கோப்ரா படத்தின் இசை வெளியீட்டு விழா நேற்று முன்தினம் நடந்தது. இந்த படத்தில் இடம் பெற்றுள்ள தரங்கிணி என்ற பாடலையும், கோப்ரா படத்தின் அனைத்து பாடல் தொகுப்புகளையும் படக்குழு வெளியிட்டுள்ளது. இசைப் புயலின் மாயாஜாலம் என குறிப்பிட்டு சமூகவலைத்தளத்தில் படக்குழு பதிவிட்டுள்ளது. இப்பாடல்கள் தற்போது ரசிகர்கள் மத்தியில் வைரலாகி வருகிறது.
