தமிழகத்தில் இயக்கப்பட்ட 7 சிறப்பு ரயில்களில் ரத்து செய்யப்பட்டதை ஆகஸ்ட் 15ஆம் தேதி வரை நீட்டித்து தெற்கு ரயில்வே அறிவித்துள்ளது.
தமிழகத்தில் சென்னையை தவிர மற்ற மாவட்டங்களில் தொடக்கத்தில் கொரோனா நோய்த்தொற்றின் தாக்கம் குறைவாக இருந்தது, இதனால் சென்னை தவிர்த்த பிற முக்கிய நகரங்களுக்கு பயணிகள் சிறப்பு ரயில்கள் இயக்க நடவடிக்கை எடுக்கப்பட்டது. முதல் கட்டமாக கோவை மயிலாடுதுறை, மதுரை, விழுப்புரம் இன்டர்சிட்டி விரைவு ரயில். திருச்சி, நாகர்கோவில் விரைவு ரயில். கோயம்புத்தூர், காட்பாடி ஆகிய நான்கு வழித்தடங்களில், ஜூன் ஒன்றாம் தேதி முதல் ரயில்கள் இயக்கப்பட்டன. இரண்டாவது கட்டமாக திருச்சி, செங்கல்பட்டு, அரக்கோணம், கோயம்புத்தூர், திருச்சி செங்கல்பட்டு ஆகிய வழித்தடங்களில் 3 சிறப்பு ரயில்கள் ஜூன் 12-ஆம் தேதி முதல் இயக்கப்பட்டன.
இதற்கிடையில் தமிழகத்தின் உள் மாவட்டங்களில் கொரோனா தொற்று வேகமாக பரவியதையடுத்து, இந்த ரயில்களின் சேவை ஜூன் 29-ம் தேதி முதல் ஜூலை 15ஆம் தேதி வரை ரத்து செய்யப்பட்டன. இதனை தொடர்ந்து சிறப்பு ரயில்கள் ரத்து, ஜூலை 31-ஆம் தேதி வரை நீட்டித்து தெற்கு ரயில்வே அறிவித்திருந்தது. இந்நிலையில் இந்த ஏழு சிறப்பு ரயில்களின் ரத்து மேலும் ஆகஸ்ட் 15ஆம் தேதி வரை நீட்டிக்கப்பட்டுள்ளது. தமிழக அரசின் கோரிக்கையின் அடிப்படையில் இந்த ரயில்கள் ரத்து நீடிக்கபடுவதாக தெற்கு ரயில்வே தரப்பில் தெரிவிக்கப்பட்டுள்ளது.