மோட்டார் சைக்கிள் நிலைதடுமாறிய விபத்தில் கல்லூரி மாணவர் பலியான சம்பவம் சோகத்தை ஏற்படுத்தியுள்ளது.
சென்னை மாவட்டத்திலுள்ள ஜாபர்கான் பேட்டை பகுதியில் வசந்தகுமார் என்பவர் வசித்து வந்துள்ளார். இவர் அப்பகுதியில் இருக்கும் தனியார் கல்லூரியில் பட்டப்படிப்பு 2-ஆம் ஆண்டு படித்து வந்துள்ளார். இவருக்கு விக்னேஷ் என்ற நண்பர் உள்ளார். இந்நிலையில் நண்பர்கள் இருவரும் மோட்டார் சைக்கிளில் ஆந்திர மாநிலத்தில் இருக்கும் ஒரு நீர்வீழ்ச்சிக்கு சென்றுள்ளனர். இதனையடுத்து இவர்கள் சென்னை-கொல்கத்தா தேசிய நெடுஞ்சாலையில் சென்று கொண்டிருந்த போது திடீரென கட்டுப்பாட்டை இழந்த இவர்களின் மோட்டார் சைக்கிள் அங்கிருந்த தடுப்பு சுவரின் மீது பலமாக மோதி விட்டது.
இந்த விபத்தில் படுகாயமடைந்த வசந்தகுமார் சம்பவ இடத்திலேயே பரிதாபமாக உயிரிழந்து விட்டார். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று வசந்தகுமாரின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் காவல்துறையினர் படுகாயமடைந்த விக்னேஷை மீட்டு மருத்துவமனையில் சிகிச்சைக்காக அனுமதித்துள்ளனர். இதுகுறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.